Rom 10 | APZ | STEP | U nje a'amu Anɨtumne'no uhu'mokuwo'nɨngkohofo soku, olo so'no nje sɨmeho wopɨngo nɨmo'nɨngkohoho. Ngko a'amu Isɨlaelɨso hofɨko Anɨtuye a'amu ne imo'nɨfitnne'enji Mpohumo jomo ne'no ulɨwo'nalokweno.

Romans 10

A'amu Isɨlaelɨso hofɨko Anɨtu kakoe yahino wopɨngoso nto'no ma'mentohofo'maho.

1 U nje a'amu Anɨtumne'no uhu'mokuwo'nɨngkohofo soku, olo so'no nje sɨmeho wopɨngo nɨmo'nɨngkohoho. Ngko a'amu Isɨlaelɨso hofɨko Anɨtuye a'amu ne imo'nɨfitnne'enji Mpohumo jomo ne'no ulɨwo'nalokweno. 2 Ngko oso a'amu somne'no huno ole niyohoho. Hofɨko Anɨtuye yahino somo unɨngkowano ko lontɨfi oso'no hofɨko Anɨtuye yahino ne so'no huno muyofoho. 3 Anɨtu kako nakune'no a'amu wopɨngo imo'nɨfitnne'ento Jisas Kɨlais nakwoe hwaho lopo uhwatɨmentisofoho. A'amu Jutaso hofɨko oso homo somo sɨmeho muyo'njo yontɨfi huno ole syofɨsyalokwofo, Nakwo hi'nwi nakwo honɨngkano hungkuno somo ito'no inɨngkowasoso wopɨngo umo'nantanoho. Hwasyo ose syofɨsyalokwofo. 4 Nakwo huno ole nayohoho. Kɨlais kako honɨngkano hungkuno somo moi'wo esojwao'mentisofoho. Oseso a'amu kako Kɨlaisɨmo sɨmeho hi'ntnnono uyoso osohumo Anɨtu kako oso a'amu osohumo ulɨmontono, Kɨko wopɨngo hwosoho. Ose ulɨmontonoho.

Anɨtu kako hwe moya'mi hopi'nonohino somo utɨma'mo lalofoho.

5 Mouses hungkuno osohi so'no mtɨ'mokumentisofoho. A'amu fihwo kako Anɨtu kɨko wopɨngo hwosoho ntone'ento kako Anɨtuye honɨngkano osomo nto'no inɨngkowalofoho. Oso hungkuno homo somo hopi'nono nto'nohini inɨngkawe sohwo'manji kako songo ne'no nohumantɨhwone hweho. 6 I oso'no a'amu Anɨtumo sɨmeho hi'ntnnono uyoso osohumo Anɨtu kako wopɨngo hwosoho ose ulɨmontonoho. Oso hwe huhwo sohwo kako huno ole mosyafɨsyonehoho. Kɨlais nakumo nefo'mayo'ne ahwomo mta'ni tɨhwo wosɨtɨmamontolo. 7 A'amu poyo pe'nnyo hwahomo'mo humalofoso Kɨlais pe'nɨmentiso osohumo tɨhwo utɨma'montolo. Ose mosyafɨsyonehoho. 8 O'o, Anɨtuye hungkunoso sekumo mose'maso'maho. A'amu Anɨtuye hungkuno mtɨ'mokumentohofo sohwa ole mtɨ'mokumentohofi, Anɨtuye hungkunoso sekwo'nji weho. Sekwoe hunomo sɨmehomo weho. Oso hungkuno mnawojo loso olenoho. Sekwo Kɨlaisɨmo sɨmeho hi'ntnnono uyɨmno. Oso hiso'no nakwo ne'no losetɨhwawo'nɨngkuhwono. 9 Olenoho. Kɨko nom'ne a'amu somo ole uso, Jisas sohwo nje Hwe Engo hweho, ose ulohoji Jisas nakwoe wonyo'ne poyo pe'nɨmentiso osohumo Anɨtu kakimo pi'nɨmo nta'ni apa'no songo ulɨka'mentiso oso homo somne'no sɨmeho hi'ntnnono uyohoji'manji Anɨtu kako kikimo asomo wokitɨma'montonoho. 10 Nakwo Anɨtu kakimo sɨmeho hi'ntnnono uyɨhwaso'no Anɨtu kako ole wonalɨmontonoho, Sekwo nje mehomi wopɨngo ne kuyoho. Nakwo nakwoe mango'nji Anɨtu kakoe hungkunoso nom'ne a'amu somo lutɨhwehwaso'no Anɨtu kako nakumo asomo netɨmanefoho.

11 A'amu Anɨtuye hungkuno mtɨ'mokumentohofo sohwa ole mtɨ'mokumentohofi, U, a'amu Anɨtumo sɨmeho hi'ntnnono uyoso sohwo kako Anɨtuye sɨmanopo lohofɨhwosi kako wonɨmango munonefoho. Ose mtɨ'mokumentohofofoho. 12 Anɨtu kako nakwo a'amu Juta'nji Ngkɨlik oso'nnonji nakwo temtitofo kengo kengo hn'nɨmo nahonɨwo'nɨngkisoso Anɨtu kakimo u'mayo'ne yahinoso afa'nohino nahonɨwo'nɨngkisofoho. Oseso nakwo a'amu hopi'nonohino hn'nwiye hwe engo anga'nohinoso Anɨtuyoho. A'amu anga'no anga'nohinoso Anɨtumo fonefo'maho ulɨkujo'no kako yahino wopɨngo wonyoangkafo uloho'montonoho. 13 A'amu Anɨtuye hungkuno mtɨ'mokumentohofo sohwa ole mtɨ'mokumentohofi, Nakwo a'amu hopi'nonohino hn'nwi nakwo nakwoe Hwe Engo Kɨlaisɨmo fonefo'maho ulɨhwaso'no kako wonefo'ma'montonoho. Nonefo'mahwosi kako asomo netɨmanefoho.

14 A'amu hofɨko Jisasɨmo sɨmeho hi'ntnnono muyo'njoso hofɨko kakimo jomo mulɨfitnnehofo. A'amu hofɨko Jisasɨye hungkuno mupa'nyo'njoso hofɨko oso hungkuno homo somo sɨmeho hi'ntnnono muyɨfitnnehofo. A'amu nom'neso hofɨko nom'ne a'amu somo Jisasɨye hungkuno molutɨhwayo'manji u oso a'amu hiso hofɨko hungkuno homo somo mupa'nɨfitnnehofo. 15 Anɨtu kako Jisas Kɨlaisɨmne'no hungkuno wopɨngo nom'ne a'amumo lutɨhwayo'ne somo molɨhwajiyo'manji oso a'amu hiso hofɨko molɨku'mopitnnehofo. A'amu Anɨtuye hungkuno mtɨ'mokumentohofo sohwa ole mtɨ'mokumentohofi, A'amu Anɨtuye hungkuno lɨku'mofo'njo sohwafe hungkunoso upa'nɨfitnne'no hofɨko oso a'amu huhwo sohwamo utɨmafɨkuji nakwo'nji fosyohumamno, ulantɨfeho. Ose ulɨkuji hofɨkoe yofe woho'nomantɨfeho.

A'amu Isɨlael fehohnjoso hofɨko Anɨtuye hungkuno wopɨngo somo tɨfi nto'no minɨngkayo'njofoho.

16 I oso'no a'amu pi'nɨngo engoso hofɨko Anɨtuye hungkuno wopɨngo upa'nontɨfi hofɨko sɨmeho umentohofo'maho. Aisaiya ole mtɨ'mokumento,

U Hwe Engofo, a'amu nakwo hungkuno ulahonɨngkuhwoni oso hungkuno homo somo sɨmeho hi'ntnnono tɨhwo uyɨmaho. O'o, awonoho.
Aisaiya ose mtɨ'mokumentisofoho. 17 Oso'no nakwo huno ole nayohi, Sɨmo'mo nakwo Anɨtuye hungkuno upo'nɨngkuhwasi tɨfi oso hungkuno hiso sɨmeho hi'ntnnono wonelɨkafono. Nakwo Kɨlaisɨmne'no hungkuno wopɨngo upo'nontani nakwo Anɨtumo sɨmeho uyalokuhwono.

18 Oseso ngko ole waselohonɨmonne'no yohono. Hofɨko Anɨtuye hungkuno wopɨngoso mupa'nɨmmentohofofoho. O'o, hofɨko nto upa'nɨmentohofofoho. A'amu Anɨtuye hungkuno mtɨ'mokumentohofo sohwa hofɨko ole so'no mtɨ'mokumentohofi,

A'amu Anɨtuye hungkuno lɨku'mofo syoho'njo sohwafe mampahoso ango'meemo ho'nɨmentisofoho.
Oseso olo hungkuno loso ango hopi'nonohino soponjoso nto mjɨpa'nɨmmentohofofoho.
Ose mtɨ'mokumentohofofoho. 19 Oso'no ngko nom'ne hungkuno waselohonɨmonne'no yohono. A'amu Isɨlaelɨso oso hungkuno homo somo nupa'nontɨfi neso huno nto'no mosyafɨhu'mmentohofotaho. O'o, oso'ne'maho. Hofɨko huno nto'no syafɨhu'mentohofofoho. Oso hiso'no Anɨtu kako Mousesɨmo hungkuno uyahonɨngki Mouses kako ole mtɨ'mokumento,

Sekwo nje hungkunomo haloho maposo'njo imentohofo so'no ngko a'amu kengo kengo somo nje hungkuno uyɨ'mo.
Wopɨngo ulohohm'me'no nohonɨngkuji sekwoe sɨmeho tohino wasemnɨmontonoho.
Ngko a'amu huno'maso osomo utɨmahm'me'no nohonɨngkuji sekwo yoka wolantɨfeho.
Mouses olo hungkuno loso ose mtɨ'mokumentisofoho. 20 I Aisaiya kako olo hungkuno loso yoloho joso'no iyoho imentiso'maho. O'o, olo hungkuno loso yokumpohn'nyo lɨmento,

A'amu ngkine'no huno mosyafɨsiyo'njoso hofɨko ngkine'no hafɨhafe matɨpewo'nɨngkiyohofoso olohonta hofɨko ngkimo nto tɨpenohonɨma'nɨngkohofo.
A'amu nom'neso hofɨko ngkine'no nom'ne a'amu somo mulohonɨwo'nɨngkiyohofo oso'njo utɨhwa'nyopo i'mofapmmentohefoho.
Ose lɨmentisofoho. 21 I oso'no Anɨtu a'amu Isɨlael somne'no ole lɨmento, Engolopohamo ngko a'amu somne'no womotohulɨjɨsyosyohumamonji ajape ulohofahonɨngko hofɨko nje hungkunomo hwotoho nɨfentɨfi hohujo ikinjanɨmofɨwo'nɨngkohofofoho. Aisaiya ose mtɨ'mokumentisofoho.